الحسن عبدالمهيمن / السودان
شاب يافع صاحب صوت مميز ومهارة في العزف علي الطنبور. بصوره مدهشه.. متاثر بمدرسة الراحل عيسي بروي. فمن هو هذا الشاب وماهي قصته
. الاسم عزالدين وداعه علي
مواليد امري الجديده القريه
من اسره فنيه هو حفيد الشاعر علي ود وداعه شاعر المناصير يلقب باللبيب له موروث شعري ثر في الحماس والفخر والغزل
تغني له الفنان عبدالكريم الحوري
ومن اشعاره علي سبيل المثال في الغزل
عندها الحيا ملبوس هدم
ودابو لا انشرط لا قدم
السنون اب رعدا ينم
يا لبيب في الصايدك وهم
يا قلب قتلك لا تهم
من عرف مقصودك يتم
الله يجمع شملك تلم
في جنينة ناظر القسم
تلقى فيها الليمون تشم
وتلقى موز ليهو الريق يجم
وقصيدة اخرى:
الكفل زي مهر النهيب
والقدم ماهو اطرق اديب
الشلخ مرسوم زي قضيب
فوقو قايدي الروبة ام وضيب
السنون اللبن الحليب
عارفو خاطري بلاها آبطيب
لي يجيبا اب فرجا قريب
وتشرب الشاي عندي شيب شيب
وتحكي وكت الخاطر يطيب
اللهج مشرق ود خطيب
والنضم نقير اب صليب
انت تكانة الفراسيب
في الوصف قدام ناس حبيب
سيدو سوالو سماد قريب
يا فريع السلم اب وضيب
اوعى راي امات قرابيب
سيدو ندمان لامن يشيب
أيضا ابن عمه الفنان الشاب صديق مصباح
وايضا شقيقه الأكبر الشاعر محمد وداعه صاحب اغنيه (هبالي النسيم) التي لحنها وتغني بها الشاب عزالدين
