السيسى يطالب لاعبى ولاعبات مصر بالمنافسة الشريفة وأخلاق الرياضة
استقبل الرئيس عبد الفتاح السيسى اللاعبين والمدربين، الحاصلين على ميداليات ذهبية بـ بطولة الألعاب الأفريقية، تكريماً لهم.
وفى كلمة له، رحب الرئيس السيسى باللاعبين والمدربين، الحاصلين على ميداليات ذهبية ببطولة الألعاب الأفريقية، معربًا عن سعادته بلقائهم، قائلًا: «ألف مبروك وبهنيكم ع اللى حققتوه».
وقال الرئيس السيسى:«انتم فرحتوا كل الناس، وكل المصريين اللى شافوا النتايج اللى انتم حققتوها، واللى ممكن كمان ربنا يوفقنا ونحققها فى باريس بيكم برضو ان شاء الله وبزمايلكم اللى موجودين هنا او اللى موجودين فى المعسكرات الرياضية برة، ربنا يوفقهم».
ووجه الرئيس السيسى الشكر للأبطال باسمه وباسم كل المصريين، كما وجه الشكر لكل المشرفين والقائمين من أجهزة إدارية وفنية، مؤكدًا أن هذا الجهد كبير جدًا.
وأكد الرئيس السيسى، على أن الرياضة تعكس مدى تحضر الدول والشعوب، وأنه كلما كان هناك نجاح وتفوق وميداليات أكثر، فإن النتيجة تعكس قدرة الدولة على المنافسة، وكلما حققت ميداليات أكثر كلما كانت قدرة الدولة عالية.
وأوضح الرئيس السيسى، أن مصر لديها عدد سكان كبير، وبالتالى فإن الفرصة سانحة لدينا لكى يكون لدينا لاعبين متميزين دوليين، «لأن عندنا حجم شباب كبير لو خد فرصته.. والكلام ده لينا كلنا ولكل مهتم بالرياضة لو الشباب خد فرصته ويبقى عنده فرصة فى لعبة معينة مش شرط كرة القدم فقط لكن فى أى من الألعاب».
و أضاف الرئيس السيسى:« مش عايز أطول عليكم، أنا سعيد إن انتوا موجودين معانا النهارده، وسعيد باللى حققتوه فى أفريقيا، وهبقى سعيد أكتر أو هنبقى كلنا سعداء أكتر باللى ممكن ربنا سبحانه وتعالي.. لأن طبعا المنافسة على مستوى العالم أكبر كتير من أفريقيا، وطبعا دول متقدمة جدًا فى مجال الرياضة بتبقى موجودة، وبالتالى لو النتائج كويسة دا معناه إن احنا ماشيين فى الطريق السليم».
وشدد الرئيس السيسى، على أنه رغم حرصنا الحصول على ميداليات وبطولات وكلام من هذا القبيل، لكن دائمًا يبقى الأسلوب وتقديم أنفسنا بشكل يليق بمصر، مضيفًا:”يعنى لو أنا النهارده لاعب أو لاعبه موجودة خارج الدولة أو حتى داخل الدولة وكنت حريص جدًا إن أنا فى ممارساتى وسلوكياتى كلها تعكس حجم كبير من التحضر والقيم الرفيعة».
وتابع الرئيس السيسى:«صدقونى بغض النظر عن النتائج، يعنى بغض النظر عن اننا نحصل على نتيجة كويسة، لكن ده جزء مهم جدا من فضلكم مهم أوى ان احنا كلنا نبقى حريصين عليه، اللى هو المنافسة الشريفة وأخلاق الرياضة المحترمة، خلوا بالكم من النقطة دى أوي، لأن ده بيبقى محل تقييم من الناس اللى بتشوفنا، وجزء كبير من الموضوع إن الناس تشوف الناس دى سلوكياتها إيه؟ وأخلاقياتها ايه؟، مش بس نتائج اللعبة».
